Ki a Maui Hudson he mea āwhina te mahi ā-wāhi motuhake hei whakatutuki i ngā herenga whānau
Ki a Maui Hudson he waimarie ia kua whai mahi e kaingākau ana – he ngāwari hoki ngā whakaritenga o taua mahi kia āhei ai ia ki te whai wā me tōna whānau.
He kaimahi ia kei te wāhanga whakawhanake i te iwi Māori o Te Tira Pūtaiao: Manaaki Tangata, Taiao Hoki (arā, ko ESR – ko te Institute of Environmental Science Research), ā, ko tana mahi ki reira he tautoko i ngā kaimahi (o ESR) ki ngā tohutohu tikanga Māori – tikanga mahi hoki – me te whakatū hononga ā-rangahau me ngā hāpori Māori – Pasifika hoki.
I mua rā, ka noho ia ki Tamaki-makaurau, ā, ka haere ia ki ngā tari kei Porirua me Ōtautahi ia wiki. Heoi, e rua tau whai muri, ka āwangawanga a Maui mō te hauora o tōna matua tāne, ā, kua huri tana titiro.
“He hiahia nōku ki te noho pātata atu ki tōku matua i Opotiki, tata ki Whakatane, arā, e whā me te haurua hāora mai i Tamaki-makaurau.”
I timata a Maui ki te rapu mahi ki Rotorua, engari, ka whakaaro ia ki te whakawhitiwhiti kōrero me ESR. “I whakamōhio atu au ki tōku kaiwhakahaere e pā ana ki ngā āhuatanga i runga i ahau, ā, ko tāna i kī mai ai, mēnā kei te pīrangi ahau ki te mahi ki te kāinga i Rotorua, he pai noa tērā. Nā, koirā tētahi mea kāore e taea mēnā kāore he hononga kaha ōku ki ngā tangata o te rōpū whakahaere whānui.
“He waimarie ahau i te kaha tautoko o taku kaiwhakawhiwhi mahi. Otirā, kua tika hoki taku whakahaere i te rangatiratanga kua tukuna mai ki ahau. He mea nui tērā, arā, ko te whakawhirinaki tonu o tō kaiwhakawhiwhi mahi mēnā he rerekē tāu whakahaere mahi.
“Ki te kāinga, he ngāwari te tīni i tāu whakaritenga mahi. Ka taea te whakarerekē i ngā wā ka mahi koe – te wā moata o te ata, te wā tōmuri o te pō rānei. Ka taea hoki e koe te mahi i ō ake hiahia i waenga o taua mahi.”
E ai ki a Maui, ko tētahi painga o te mahi mai i te kāinga, ka whai wā me tōna whānau. “Tokorua aku tamariki e haere ana ki te kura tuatahi, ā, he pai nā te mea ka taea e rāua te hīkoi ki te kāinga mai i te kura me te mōhio he tangata kei te kāinga e whanga ana ki a rāua.”
Ko tētahi hua anō kua kitea e Maui, ka tere oti i a ia āna mahi. “Ki te kāinga, ka taea e koe te hāngai pū ki ngā mahi e tika ana me oti – me te kore pā mai o ngā āhuatanga tītahataha noa o te tari.”
E rua rā ia wiki ka haere tonu a Maui ki ngā tari o ESR ki te poipoi i ngā hononga ki ōna hoa mahi. “He pai ki ahau te haere ia wiki mō te whanaungatanga me tangata kē. Taku waimarie hoki he ngāwari hoki ngā whakaritenga mahi o taku hoa rangatira. Nā, mēnā kei waho ahau i te tāone, ka taea e ia te tutaki i ngā tamariki i te wā ka hoki rāua ki te kāinga. Te mutunga iho, he tauritenga pai tēnei āhuatanga.”
Nō Te Whakatōhea, Ngā Ruahine me Te Mahurehure a Maui Hudson.
